Вӧчны сійӧс, мый радейтан

Октябрь 27 лунсянь ноябрь 4 лунӧдз Сыктывкарын кӧкъямысӧдысь нин нуӧдӧны «Мы – россияне» этнофорум. Тайӧ уджтас сертиыс котыртлӧны и онлайн акция-конкурсъяс, и «ловъя» лекция-мастер-классъяс. Ыджыд шуд усис и меным межэтническӧй журналистикалы сиӧм школаын велӧдчысьяскӧд тшӧтш пырӧдчыны тайӧ форумас.

Шӧр уджыс муніс октябрь 28-29 лунъясӧ. Гажсӧ кыпыда восьтӧм бӧрын пырӧдчысьяс юксисны кык пельӧ: ӧтияс водзмӧстчисны велӧдан юкӧнын, мӧдъяс – «ЭтноМедиаын».

Туристъясӧс ышӧдны

Миянӧс, «ЭтноМедиа» юкӧнӧ пырӧдчысьясӧс, автобусӧн нуӧдісны Ыбса финн-йӧгра этнопаркӧ. Сэні вочааліс директорыс Елена Иванова, коді висьтасис туризм сӧвмӧдӧм да этнопарклӧн удж йылысь.

– Ӧні ми нуӧдам кык нималана ыджыд фестиваль, кодъяс лоисны сідз шусяна брендӧн: «ШаньгаФест» да «Живой воздух», – медводз пасйис Елена Васильевна.

Тайӧ учреждениесӧ восьтӧмаӧсь 10 во сайын, медым кутны мукӧд регионкӧд йитӧд.

– Ме этнопарксӧ шуа финн-йӧгра культуралӧн «подиумӧн». Ӧд йӧзыс татчӧ волывлӧны тӧдмасьны уна сикас войтырлӧн традицияясӧн, – тӧдчӧдіс директор. – 2017 восянь Россияын пыдісянь сӧвмӧ пытшкӧсса туризм и такӧд йитӧдын миян учреждение водзын сувтісны выль могъяс. Ми лӧсьӧдім Коми Республикалысь юӧр сетан турпортал, татчӧс туризм йылысь висьтасим мукӧд регионын, дасьтім Сыктывкарлысь да Коми Республикалысь картаяс, вӧчим сідз шусяна путеводитель, кытчӧ пыртім кар-районлӧн тӧдчана инъяс йылысь пасйӧдъяс...

Полностью материал Ирины Терентьевой на коми языке можно прочитать на сайте Издательского дома Коми.

10.11.2021