Наврузым пайремлыме

20 мартыште Йошкар-Оласе Республикысе татар тÿвыра рÿдер Навруз пайремым эртарен. Тудым тÿрлö калыкын ÿдыр-эргышт ончаш толыныт: киргиз, таджик, туркмен, армян, азербайджан да молат. 
Навруз пайрем фольклор да театр сынан представлений дене тÿҥалын. Татар тÿвыра рÿдерын вуйлатышыже Ильгис Гайсин да Марий Элысе йоча да самырык-влаклан театр-рÿдерын вуйлатышыже Эдуард Александров толшо уна-влакым саламленыт. Театр сынан представленийыште Шурале, Вуверкува, Йÿштö Кугыза да шошым кондышо чевер ÿдыр Навруз калыкын кумылыштым нöлтеныт. 
Пайрем калык йÿла почеш эртен. Шолтымо пучымышым тулышко «Карр, карр, Туем җитте, барр, барр. Ярма, күкәй алып бар. Карр, карр, карр!» («Кар, кар, Кар, кар, Шемгорак-влак кычкырат, Беляш дене тич конгат, Уло гын беляшыжат, Уло таче унажат! Кар, кар, кар») манын, кышкеныт. Тыге Тул Юмым пукшеныт. Калыклан шем да ош тÿсан тасмам пуэденыт: шемыжым тулышко, осалже кайже манын, кудалтеныт, а ошыжым куэ укшыш сай тыланымаш дене кылденыт.
Тÿрлö калык гыч лекше студент-влак мастарлыкыштым ончыктеныт: муро-влакым йоҥгалтареныт, куштеныт да шке калык модышышт дене модыктеныт. Киргиз-влак «Хан Таламай» да «Чүкее» модыш дене палдареныт. Шорыкйол лу гыч ыштыме модышым «Альчик» маныныт. Мешак дене таҥасымаш, турняйол дене коштмаш, кандырам шупшмаш да моло конкурс-влак эртеныт. Концерт программым йоча-влакат шке муро-куштымашышт дене сöрастареныт.
Навруз – тиде еш пайрем. Тÿрлö калык иквереш чумырген, ик ой дене, ик еш семын пайремым эртара. А эше тушто чылан пырля пловым кочкыт! Тыгай тамле чес кеч-кöнат кумылжым савыра.

Татьяна Япаева.